AYA
Aya nu nyeredet jeroeun dada saban liwat palebah dinya. Sakapeung ngarasa bungah tur bagja nepi ka seuri sorangan. Ari mimindengna mah kanyeri turta kahanjakal nu montel pageuh minuhan dada. Asa ngabegegel dina hulu angen. Eungap. Kudu we ngarenghap jero sangkan ngurangan bangbaluh na jero ati.
Lebah dinya baheula kuring teu weleh turun tina elf mun rek muru ka imah anjeun. Boh ti kulon atawa ti wetan. Ti kulon mun balik gawe, ti wetan mun mangkat ti imah kolot. Sok sanajan ti lebah dinya jugjugeun jauh keneh, tapi hate mah geus bungangang kacida kusabab teu lila deui bakal panggih jeung anjeun. Kembang hate kuring. Turun tina elf kuring langsung menta pangjajap tukang ojeg muru Cukang Akar, padumukan anjeun. Tara tatawar deui menta sabaraha oge, nu penting bisa geura tepi ka anjeun...emmhh...
Aya, aya keneh sagala ingetan ngeunaan anjeun. Inget keneh sabaraha lobana pengkolan nu kudu kasorang memeh anjog ka anjeun. Natrat atra dina kongkolak mata sagala rupa kaayaan di imah anjeun. Pagerna, tepasna, pantona, karpetna, korsina, lomarina, tempat sarena, tempat daharna tug nepi ka angseu rohangan-rohangan di imah anjeun tetep anteb dina hate kuring.
Aya keneh, malah mah lengkep keneh kacida sagala obrolan jeung kalakuan urang duaan saban nyolong-nyolong kasempetan mun pareng paduduaan. Aya keneh, gamblang keneh nyarina imut anjeun, halimpuna sora anjeun dina hate kuring. Karasa keneh haneutna awak anjeun mangsa urang silih tangkeup, silih tamplokeun kasuka.
Emh geulis...anjeun mah tangtuna geus tenang, kantun hagetna ngawulaan nu janten caroge. Tangtosna tos teu kedah isin-isin mun nuju hoyong diogo. Bagja anjeun geulis. Sok sing tumaninah. Kuring ngan ukur bisa ngajurung ku du'a, sangkan anjeun salawasna pinanggih jeung kabagjaan, dijauhkeun, disinglar tina sagala kahariwang anjeun nu baheula jadi cukang pegatna kadeudeuh urang.
Wilujeng geulis.
Poto anjeun aya keneh.
Warung Bandrek beuki rame, angger jadi pangeureunan elf. Nu ti kulon nu ti wetan.
kahatur kanu geulis di cibatu.
No comments:
Post a Comment